Janubiy Koreya razvedkasi ma’lumotlariga ko‘ra zenit to‘pi bilan otib o‘ldirilgan KXDR mudofaa vaziri Shimoliy Koreya televideniyesi orqali ko‘rsatildi. Bu haqda Renxap agentligi xabar berdi, deb yozadi “Korrespondent.net”.
Agentlik ta’kidlashicha, Shimoliy Koreyada odatda hukumatning jazolangan vakillarini gazetalarda tilga olmay, teleko‘rsatuvlarda tasvirini ko‘rsatmay qo‘yadi.
Biroq Janubiy Koreya birlashuv vazirligi vakili jazolangan mansabdorlarning televideniyeda namoyish etilishi holatlari avvallari ham kuzatilganini qayd etdi.
“Xyonni nima uchun haligacha televideniye orqali ko‘rsatishayotganini batafsil tahlil qilish lozim”, — dedi u.
Eslatib o‘tamiz, Janubiy Koreya razvedkasi KXDR mudofaa vaziri Xyon Yon Chxol davlatga xiyonat qilishda ayblanib, qatl etilganini xabar qilgan edi.
Razvedka ma’ruzasida aytilishicha, mudofaa vaziri harbiy majlis chog‘ida Kim Chen In qarshisida mudrab qolgani ayblovga asos bo‘lib xizmat qilgan. Natijada vazir zenit to‘pi bilan otilgan.
Qatl 30-aprel atrofida Pxenyandagi harbiy bilim yurti hududida amalga oshgan.
Keyinroq KXDR mudofaa vaziri Xyon Yon Chxolning qatl etilishi Pxenyandagi g‘alayonlar haqidagi tasdiqlanmagan axborot bilan bir vaqtda ma’lum bo‘lgani xabar berildi. G‘alayon haqidagi axborot Kim Chen Inning kutilmaganda Moskvadagi G‘alaba paradiga borish fikridan qaytishiga sabab bo‘lgan bo‘lishi mumkin.
Izoh (0)