БМТ бош котиби Бурундидаги давлат тўнтаришига уринишни қоралаб чиқди

БМТ бош котиби Пан Ги Мун Бурундида давлат тўнтаришига уринишдан кейин юзага келган вазият бўйича хавотир билдирди, дея хабар бермоқда ТАСС.

Унинг маъмурияти тарқатган ёзма баёнотда Пан Ги Мун «сайланган ҳукуматни ҳарбий куч ёрдамида мансабдан олишга бўлган» уринишларни қоралади ва мамлакат конституциясини ҳурмат қилишга чақирди.

Пан Ги Мун Бурундидаги барча томонларни зўравонликка қарши чиқиш, қасос олишдан тийилиш ва ўз жангариларининг жиловини тортиб қўйишга даъват этди.

Бош котиб БМТ Бурундидаги инқироздан чиқиб кетиш йўлларини минтақадаги шериклар билан қидиришда давом этишига ишонтирди.

Аввалроқ Бурундидаги давлат тўнтарилиши ташкилотчиларидан бири уларнинг уринишлари муваффақиятсизликка учраганини тан олган эди.

Эслатиб ўтамиз, Африка қитъасида жойлашган Бурунди давлатида ҳарбий давлат тўнтаришига уриниш бўлган, кейинроқ у бостирилган эди.

13 майдан 14 майга ўтар кечаси полиция кийимидаги номаълум шахслар иккита хусусий радиостанися ва телеканални эгаллаб, генерал Годфруа Нийомбаре номидан Нкурунзиза учинчи марта президентлик сайловида иштирок этиш истагини билдириб, Конститутцияни бузгани учун ҳокимиятдан четлатилиши ҳақидаги мурожаатни ўқиб эшиттирган.

Ўша пайтда Танзанияда бўлиб ўтаётган Африка давлатлари раҳбарлари саммитида иштирок этаётган Бурунди президенти Пер Нкурунзиза ўзининг Twitter’даги саҳифасида мамлакат аҳолисини хотиржамликка чақириб пост жойлаштирган.

14 май, пайшанба куни президент мамлакатга қайтиб келган.