КХДР мудофаа вазири Хён Ён Чхолнинг қатл этилиши Пхеньяндаги ғалаёнлар ҳақидаги тасдиқланмаган ахборот билан бир вақтда маълум бўлди. RBC.ru’нинг The Telegraph’га асосланиб хабар беришича, ғалаён ҳақидаги ахборот Ким Чен Иннинг кутилмаганда Москвадаги Ғалаба парадига бориш фикридан қайтишига сабаб бўлган бўлиши мумкин.
«Ким Чен Ин Москвага сафарини жуда кеч бекор қилди ва, шундай эҳтимол борки, КХДР етакчиси ўзи хорижда бўлган вақтда ҳарбийлар уни ҳокимиятдан четлатишга уринмоқчи эканликларидан хабардор бўлиб қолган», - деди Япониядаги Васеда университети профессори Тошимицу Шигемура.
Нашрнинг ёзишича, бир йил аввал мудофаа вазири этиб тайинланган Хён Ён Чхол «ёш диктаторнинг фикрларига очиқчасига қарши чиққан» деган тахминлар ҳам бор.
Шигемуранинг фикрича, вазирнинг қатл этилишидан мақсад жамиятга, энг аввало, ҳарбийларга Ким Чен Ин тузумига қарши чиққанларнинг аҳволи қандай бўлиши ҳақида хабар бериш ва намойиш этишдир.
Аввалроқ, Жанубий Корея разведкаси маълумотларига асосланиб, Хён Ён Чхол зенит ускунасига қўйилган ҳолда 30 апрель куни отиб ташлангани ҳақида хабар берилган эди. У давлатга хиёнатда айбланган эди. Қайд этишларича, вазир КХДР етакчиси иштирокидаги мажлис вақтида ухлаб қолгани учун қатл этилган.
30 апрель куни Ким Чен Ин Москвадаги Ғалабага парадига келмаслиги маълум бўлганди. Россия президенти Владимир Путиннинг матбуот котиби Дмитрий Песков Ким Чен Ин бу қарорни КХДРнинг ички ишлари сабаб қабул қилганини маълум қилганди.
Изоҳ (0)