Россия АҚШнинг Обамадан кейинги президенти Вашингтон ва Москва ўртасидаги муносабатларни тиклай олишига умид қилади. Бу ҳақда, RBC.ru хабарига кўра, Россия президенти Владимир Путиннинг матбуот котиби Дмитрий Песков NBC’га берган интервьюсида айтиб ўтган.
«Ким Америка президенти этиб сайланишидан қатъий назар, бу одам мамлакатларимиз ўртасидаги икки томонлама муносабатларнинг қайта тикланиши устида ишлайди, деб ишонгимиз келади», - деди Песков.
«Биз сизнинг танловингизга ҳурмат билан муносабатда бўламиз ва икки томонлама муносабатларимизда кузатиладиган энг кичик ижобий ўзгаришларни ҳам хурсандчилик билан қабул қиламиз», - дея қўшимча қилди Путин матбуот котиби.
Путин собиқ давлат котиби Ҳиллари Клинтон АҚШ президенти этиб сайланса, у билан ишлай оладими қабилида берилган саволга жавоб бераркан, Песков Россия давлати етакчиси «жуда прагматик» ва «ҳар доим ҳамкорлик учун очиқ ва яхши муносабатларни тиклашга тарафдор» инсон эканлигини қайд этиб ўтди.
Матбуот котибининг қўшимча қилишича, «америкалик сиёсатчилар, афсуски, Россияда бўлаётган ҳодисалар ҳақида тўлиқ ахборот ололмаяпти». Песков АҚШда 2016 йили бўлиб ўтадиган президент сайловини назарда тутган ҳолда, «Кремль АҚШнинг ички ишларига аралашмаслигини» қайд этиб ўтди.
Ҳиллари Клинтон АҚШ Demoкратик партиясидан мамлакат президентлиги учун энг асосий номзод ҳисобланади. Республикачилар орасида эса Флориданинг собиқ губернатори Жеб Буш ва Ню-Жерсининг амалдаги губернатори Крис Кристи асосий даъвогар сифатида кўрилмоқда, бироқ улар ҳозирча сайловолди кампаниясига қўшилганликлари ҳақида расман баёнот берганича йўқ.
Песков ўз интервьюсида АҚШ ва Россия алоҳида-алоҳида ҳал қила олмайдиган муаммолар, масалан, «терроризмга қарши кураш» масаласи борлигини қайд этиб ўтди. «Биз очиқмиз ва бундан кейин ҳам мулоқот учун очиқ қоламиз, бироқ тангони бир киши ўйнай олмайди. Агар Вашингтон буни хоҳламаса, Вашингтоннинг қандайдир бурчакларида бунга тайёргарлик туғилмагунича кутишга сабримиз етади», - деди Песков.
Путиннинг матбуот котиби сўзларига кўра, Россия миллий манфаатларига дахлдор масалаларда Москванинг ён бермаслигини агрессия деб ҳисобламаслик керак. Шунингдек, Песков АҚШнинг Европа давлатлари ҳукуматларини Москвадаги Ғалаба парадини бойкот қилишга уринишини ҳам қоралади. «Баъзида биз Вашингтон бу ишларни нима учун қилаётганини шунчаки тушунмай қоламиз», - деди Песков.
Изоҳ (0)