Samarqand shahrida joylashgan Avtomobilsozlik kolleji hududida Samarqand avtomobil zavodi (“SamAvto” MChJ)da ishlab chiqarilgan ISUZU shassisi asosida harakatlanuvchi transport vositalarini texnik ta’mirlash ishlari bilan shug‘ullanuvchi mutaxassislar o‘rtasida texnik musobaqa bo‘lib o‘tdi. Bu haqda “O‘zavtosanoat” kompaniyasi matbuot xizmati xabar bermoqda.
O‘tgan 2013- va 2014-yillardan farqli o‘laroq, bu yilgi tanlovga qiziqish ancha ortganligi qayd etildi: tanlovda qatnashish uchun O‘zbekistonning turli viloyatlarida joylashgan jami 14ta dilerlik markazlari o‘z arizalarini topshirdilar. Bu safar Samarqand avtomobil zavodi ham o‘z jamoasini tayyorlashga muvaffaq bo‘ldi.
Jamoalar tarkibiy qismiga ham o‘zgartirishlar kiritildi: jamoaning avvalgi tarkibi ikki nafar avtomexanikdan iborat edi, bu yili esa jamoalar safi sardorlar hisobiga kengaytirildi.
Bo‘lib o‘tgan “Avtomexanik-2015” tanlovida Toshkent shahri, Qoraqalpog‘iston, Farg‘ona, Buxoro va Samarqand viloyatlaridan ikkitadan jamoa, Namangan, Qashqadaryo, Surxondaryo, Xorazm va Navoiy viloyatlaridan bittadan jamoalar ishtirok etdi.
Musobaqa natijalariga ko‘ra, 1-o‘ringa Samarqand avtomobil zavodi jamoasi: jamoa sardori Hubbimov Ahror hamda avtomexaniklar Babatov Jasurbek va Norxo‘jayev Saidrasullar sazovor deb topildi.
2-o‘rinni, ikkinchi yildirki, “AvtoZAZ” MChJ Samarqand dilerlik markazi vakillari: jamoa sardori Zakeryayev Mustafa hamda avtomexaniklar Yorbekov Suhrobjon va Seytveliyev Emillar qo‘lga kiritdilar.
3-o‘rin bu yili namanganlik mutaxassislar, “NamAvto Universal Trans Servis” MChJ dilerlik markazi vakillari: jamoa sardori Ortiqov Bori hamda avtomexaniklar Nishonov Rosul va Bogoslovskiy Vasiliylar qo‘lga kiritdi.
Shuningdek, musobaqaning taqdirlash marosimida turli nominatsiyalar bo‘yicha ham g‘oliblar aniqlandi.
G‘oliblar 2015-yilning kuzida Yaponiyada bo‘lib o‘tadigan ISUZU I-1 Grand-Prix nufuzli xalqaro texnik musobaqasida O‘zbekiston jamoasi tarkibida qatnashish imkoniyatini qo‘lga kiritish uchun keyingi saralovchi bosqichlarga yo‘l oladi.
2014-yili Yaponiyada o‘tkazilgan ushbu texnik musobaqaning “B” guruhida zavodning uch nafar mutaxassisi ishtirok etib, faxrli 3-o‘rinni qo‘lga kiritgan edi.
Izoh (0)