Самарқандда ISUZU мутахассислари ўртасида техник мусобақа бўлиб ўтди

Самарқанд шаҳрида жойлашган Автомобилсозлик коллежи ҳудудида Самарқанд автомобиль заводи («SamAvto» МЧЖ)да ишлаб чиқарилган ISUZU шассиси асосида ҳаракатланувчи транспорт воситаларини техник таъмирлаш ишлари билан шуғулланувчи мутахассислар ўртасида техник мусобақа бўлиб ўтди. Бу ҳақда «Ўзавтосаноат» компанияси матбуот хизмати хабар бермоқда.

Ўтган 2013 ва 2014 йиллардан фарқли ўлароқ, бу йилги танловга қизиқиш анча ортганлиги қайд этилди: танловда қатнашиш учун Ўзбекистоннинг турли вилоятларида жойлашган жами 14та дилерлик марказлари ўз аризаларини топширдилар. Бу сафар Самарқанд автомобиль заводи ҳам ўз жамоасини тайёрлашга муваффақ бўлди.

Жамоалар таркибий қисмига ҳам ўзгартиришлар киритилди: жамоанинг аввалги таркиби икки нафар автомеханикдан иборат эди, бу йили эса жамоалар сафи сардорлар ҳисобига кенгайтирилди.

Бўлиб ўтган «Автомеханик-2015» танловида Тошкент шаҳри, Қорақалпоғистон, Фарғона, Бухоро ва Самарқанд вилоятларидан иккитадан жамоа, Наманган, Қашқадарё, Сурхондарё, Хоразм ва Навоий вилоятларидан биттадан жамоалар иштирок этди.

Мусобақа натижаларига кўра, 1-ўринга Самарқанд автомобиль заводи жамоаси: жамоа сардори Ҳуббимов Аҳрор ҳамда автомеханиклар Бабатов Жасурбек ва Норхўжаев Саидрасуллар сазовор деб топилди.

2-ўринни, иккинчи йилдирки, «АвтоЗАЗ» МЧЖ Самарқанд дилерлик маркази вакиллари: жамоа сардори Закеряев Мустафа ҳамда автомеханиклар Ёрбеков Суҳробжон ва Сейтвелиев Эмиллар қўлга киритдилар.

3-ўрин бу йили наманганлик мутахассислар, «НамАвто Универсал Транс Сервис» МЧЖ дилерлик маркази вакиллари: жамоа сардори Ортиқов Бори ҳамда автомеханиклар Нишонов Росул ва Богословский Василийлар қўлга киритди.

Шунингдек, мусобақанинг тақдирлаш маросимида турли номинациялар бўйича ҳам ғолиблар аниқланди.

Ғолиблар 2015 йилнинг кузида Японияда бўлиб ўтадиган ISUZU I-1 Grand-Prix нуфузли халқаро техник мусобақасида Ўзбекистон жамоаси таркибида қатнашиш имкониятини қўлга киритиш учун кейинги сараловчи босқичларга йўл олади.

2014 йили Японияда ўтказилган ушбу техник мусобақанинг “B” гуруҳида заводнинг уч нафар мутахассиси иштирок этиб, фахрли 3-ўринни қўлга киритган эди.