Polshaning futbol bo‘yicha quyi ligasi jamoalari o‘rtasida 2-may kuni o‘tkazilgan uchrashuv vaqtida politsiyachi muxlislardan birini otib qo‘ydi, deb xabar beradi “RIA Novosti”.
Voqea “Konkordiya” (Knuruv) va “Rux” (Radzenkuv) jamoalari o‘rtasidagi o‘yin vaqtida sodir bo‘ldi. Birinchi taym davom etayotganda fanatlar maydonga petarda va tosh otishni boshladi, hakam 35-daqiqada uchrashuvni to‘xtatishga majbur bo‘ldi. Shundan so‘ng muxlislar maydonga tushib ketdi, politsiya kuch ishlatishga majbur bo‘ldi va bezorilarga qarata rezina o‘q otdi. Ishqibozlarlardan biri bo‘ynidan yaralandi va shifoxonaga olib ketildi, ammo bir necha soatdan so‘ng hayotdan ko‘z yumdi.
Polshaning RMF 24 radiostansiyasi bergan xabarga ko‘ra, 27 yoshli fanatning o‘limidan so‘ng 200 ga yaqin kishi kasalxona va Knuruvdagi politsiya uchastkasi oldiga yig‘ilgan. Keyinroq politsiya bilan to‘qnashuvlar boshlangan. To‘qnashuvlar natijasida 3 yoki 4 politsiyachi jabrlangan.
Kasalxonani qo‘riqlayotgan politsiyachilarga hujum qilgandan so‘ng, tartibsizlik uyushtirganlar qochib ketgan. Politsiya shahar bo‘ylab bezorilarni to‘xtatishga urinmoqda.
Izoh (0)