Toshkent shahrida Shayxontohur va Yunusobod tumanlarini bog‘lovchi yangi Sebzor ko‘prigi va uning atrofidagi infratuzilmalarda so‘nggi ta’mirlash-montaj ishlari olib borilmoqda. Bu jarayonning suratlari Facebook’dagi “Voditeli Tashkenta” guruhida e’lon qilingan.
Tasdiqlanmagan ma’lumotlarga ko‘ra, ko‘prikning ochilishi 9-may – Xotira va qadrlash kuni arafasida bo‘lib o‘tadi. Hozirgi vaqtda ushbu tadbirga faol tayyorgarlik ishlari olib borilmoqda.
Jumladan, asosiy avtomobil ko‘prigida ishlar deyarli tugallangan, chiroq ustunlari o‘rnatilib, shay holatga keltirilgan. Shahardagi ilk piyodalar yerusti o‘tish yo‘liga esa eskalatorlarni o‘rnatish ishlari davom etmoqda. Atrofdagi hududlar esa ko‘kalamzorlashtirilmoqda.
Ayni vaqtda, foydalanuvchilarning qayd etishlaricha, kuni kecha shaharda kuzatilgan yomg‘ir qurilishning ba’zi kamchiliklarini ham ko‘rsatib qo‘ygan. Xususan, kuchli yomg‘irdan so‘ng yangi ta’mirlangan yo‘llardan biri, to‘plangan suvning chiqishi uchun imkon bo‘lmagani sababli, “kanalga aylanib qolgan”.
Eslatib o‘tamiz, Sebzor ko‘prigi qurilishi 2014-yil sentyabrida boshlangan edi va, dastlabki reja bo‘yicha, qurilish ishlari bir yil davom etishi kerak edi. Biroq keyinroq ish jadvali o‘zgarib, qurilish belgilanganidan uch oy avval bitishi ma’lum qilindi.
Izoh (0)