Rossiya Ukrainadan O‘zbekistonga kelayotgan 38 tonna parranda go‘shtini o‘tkazmadi

Rossiyaning qishloq xo‘jaligi mahsulotlari sohasini tartibga soluvchi federal xizmati – “Rosselxoznadzor” Rossiya orqali O‘zbekistonga olib ketilayotgan 38 tonnadan ziyod parranda go‘shtini Ukrainaga qaytarib yubordi. Bu haqda UzDaily xabar bermoqda.

Ma’lum bo‘lishicha, 28-aprel kuni “Troyebortnoye” ko‘p tomonlama avtomobil o‘tkazish punktiga Ukrainaning “Agro-Oven” kompaniyasi tomonidan ishlab chiqarilgan parranda go‘shtining ikki partiyasi kelib tushgan.

Umumiy og‘irligi 38 tonnadan ziyod bo‘lgan yuk O‘zbekistondagi Baminda Lux kompaniyasiga yetkazib berilishi kerak bo‘lgan, unga Ukraina davlat veterinariya xizmati tomonidan veterinariya guvohnomasi berilgan.

“Rosselxoznadzor” xodimlari tomonidan o‘tkazilgan tekshiruv davomida parranda go‘shti ortilgan qutilarning ba’zilarida mahsulot ishlab chiqarilgan sana ko‘rsatilmagani, transport vositasining holati esa sanitariya talablariga zid ekanligi aniqlangan.

Ko‘rsatilgan sabablardan kelib chiqib, Rossiya tomoni yukni ortga, Ukrainaga qaytarib yuborish haqida qaror qabul qilgan.