Тошкентдаги янги Себзор кўприги расмий очилишга тайёрланмоқда

Тошкент шаҳрида Шайхонтоҳур ва Юнусобод туманларини боғловчи янги Себзор кўприги ва унинг атрофидаги инфратузилмаларда сўнгги таъмирлаш-монтаж ишлари олиб борилмоқда. Бу жараённинг суратлари Facebook’даги «Водители Ташкента» гуруҳида эълон қилинган.

Тасдиқланмаган маълумотларга кўра, кўприкнинг очилиши 9 май – Хотира ва қадрлаш куни арафасида бўлиб ўтади. Ҳозирги вақтда ушбу тадбирга фаол тайёргарлик ишлари олиб борилмоқда.

Жумладан, асосий автомобиль кўпригида ишлар деярли тугалланган, чироқ устунлари ўрнатилиб, шай ҳолатга келтирилган. Шаҳардаги илк пиёдалар ерусти ўтиш йўлига эса эскалаторларни ўрнатиш ишлари давом этмоқда. Атрофдаги ҳудудлар эса кўкаламзорлаштирилмоқда.

Айни вақтда, фойдаланувчиларнинг қайд этишларича, куни кеча шаҳарда кузатилган ёмғир қурилишнинг баъзи камчиликларини ҳам кўрсатиб қўйган. Хусусан, кучли ёмғирдан сўнг янги таъмирланган йўллардан бири, тўпланган сувнинг чиқиши учун имкон бўлмагани сабабли, «каналга айланиб қолган».

Эслатиб ўтамиз, Себзор кўприги қурилиши 2014 йил сентябрида бошланган эди ва, дастлабки режа бўйича, қурилиш ишлари бир йил давом этиши керак эди. Бироқ кейинроқ иш жадвали ўзгариб, қурилиш белгиланганидан уч ой аввал битиши маълум қилинди.