Malayziya va Gollandiya ekspertlari Malayziyaning Boeing layneri qulagan Ukrainaning Donesk viloyati Grabovo qishlog‘i yaqinidagi hududda halok bo‘lganlar jasadlarining ko‘plab bo‘laklarini topishdi. Bu haqda Gollandiya ekspertlar guruhi vakili Maykl Marshal ma’lum qildi, deya xabar bermoqda “Segodnya.ua”.
“Biz halokat joyida ko‘plab jasadlarning bo‘laklarini topdik. Ish reja bo‘yicha ketmoqda, biroq ob-havo noqulayligi sabab ikki kunga ishni to‘xtatdik. Ishni davom ettirib, avariya joyini tozalashda davom etamiz. Ish qachon tugashini aytish qiyin, biroq, dastlabki ma’lumotlarga ko‘ra, kelasi payshanba ishni yakunlaymiz”, - dedi u.
Eslatib o‘tamiz, Malaysia Airlines’ning Amsterdamdan Kuala-Lumpurga uchib ketayotgan Boeing-777 layneri 2014-yil 17-iyulida Ukraina sharqida halokatga uchragan edi. Samolyot bortida bo‘lgan 298 kishining hech biri omon qolmagan. Taxminiy ma’lumotlarga ko‘ra, samolyot raketa bilan urib tushirilgan.
Avvalroq Gollandiya hukumati Donbassdagi Boeing-777 layneri halokati bilan bog‘liq hujjatlarning katta qismini e’lon qilgandi.
Izoh (0)