Донбассдаги Boeing-777 лайнери қулаган ҳудудда кўплаб жасадларнинг бўлаклари топилди

Малайзия ва Голландия экспертлари Малайзиянинг Boeing лайнери қулаган Украинанинг Донеск вилояти Грабово қишлоғи яқинидаги ҳудудда ҳалок бўлганлар жасадларининг кўплаб бўлакларини топишди. Бу ҳақда Голландия экспертлар гуруҳи вакили Майкл Маршал маълум қилди, дея хабар бермоқда «Segodnya.ua».

«Биз ҳалокат жойида кўплаб жасадларнинг бўлакларини топдик. Иш режа бўйича кетмоқда, бироқ об-ҳаво ноқулайлиги сабаб икки кунга ишни тўхтатдик. Ишни давом эттириб, авария жойини тозалашда давом этамиз. Иш қачон тугашини айтиш қийин, бироқ, дастлабки маълумотларга кўра, келаси пайшанба ишни якунлаймиз», - деди у.

Эслатиб ўтамиз, Malaysia Airlines’нинг Амстердамдан Куала-Лумпурга учиб кетаётган Boeing-777 лайнери 2014 йил 17 июлида Украина шарқида ҳалокатга учраган эди. Самолёт бортида бўлган 298 кишининг ҳеч бири омон қолмаган. Тахминий маълумотларга кўра, самолёт ракета билан уриб туширилган.

Аввалроқ Голландия ҳукумати Донбассдаги Boeing-777 лайнери ҳалокати билан боғлиқ ҳужжатларнинг катта қисмини эълон қилганди.