Rossiyalik harbiy ekspertlar Shimoliy Shotlandiydagi NATO mashg‘ulotlariga yetib kelishdi. “Segodnya.ua”ning xabar berishicha, ushbu mashg‘ulotlardan maqsad – Kreml tomonidan tajovuz tahdidi o‘sib borayotgan vaqtda kuchni ko‘rsatib qo‘yishdan iborat.
“Mudofaa vazirligi, Yevropada qurollanish ustidan nazorat o‘rnatish shartnomasiga muvofiq, Moskvadan to‘rt kunga kelgan harbiy ekspertlarni qabul qilishga majbur bo‘ldi”, - deyiladi The Telegraph xabarida.
Rossiya delegatsiyasining tashrifi dushanba kuni Typhoon qiruvchi samolyotlari joylashgan Lossimuti bazasidan boshlangan – aynan shu samolyotlar avvalroq Rossiyaning strategik bombardimonchilarini qo‘lga olish uchun havoga ko‘tarilgan edi.
Rossiyalik ekspertlar Shimoliy Shotlandiyada ham bo‘lishadi – bu yerda 14 mamlakatdan kelgan 55 harbiy kema va 70dan ortiq samolyot, 13 ming askar, dengizchi va uchuvchi Joint Warrior qo‘shma mashg‘ulotlarida ishtirok etadi.
“Manbalarning ma’lum qilishicha, Qrim anneksiya qilinib, Moskva va Alyans o‘rtasidagi munosabatlar sovuqlashganidan beri, rossiyalik nazoratchilar ilk bor NATO mashg‘ulotlarida ishtirok etishmoqda”, - deyiladi maqolada.
Rossiyaning Ukrainaga nisbatan tajovuzi sabab NATO Rossiya bilan barcha sohalardagi hamkorlikni to‘xtatgan edi.
Avval xabar berilganidek, Rossiyaning Ukraina sharqidagi jangovar harakatlardagi ishtiroki sabab, Rossiyaga qo‘shni mamlakatlar o‘z harbiy xarajatlarini oshirishga kirishgan. Joint Warrior mashqlari esa mintaqada Rossiya floti faolligi oshganiga javoban o‘tkazilmoqda.
Izoh (0)