Ўз вақтида Шимолий ва Жанубий Американи ажратиб, Тинч ва Атлантика океанларини бирлаштириб турган бўғоз 13-15 миллион йил олдин, яъни, шу вақтгача тахмин қилинганидан 10 миллион йил аввал ёпилган. ТАССнинг хабар беришича бу борадаги тадқиқот натижалари Science журналининг сўнгги сонида эълон қилинган.
АҚШнинг Андес университети вакили Камило Монтесаиз бошчилигидаги тадқиқотчилар гуруҳи Шимолий Анд тоғларидаги саккиз қудуқ ва икки геологик ёриқдан олинган тоғ жинслари намуналарини ўрганиб чиқди.
Тадқиқот шуни кўрсатдики, Анднинг миоцен даври (23,03-5,33 миллион йил аввал)га оид тоғ жинсларида Панамадан оқиб келган, цирконийга бой чўкиндилар бор.
Анднинг нисбатан қадимги тоғ жинсларида, хусусан, миоценнинг боши ва олигоцен даврига (33,9-23,03 миллион йил аввал) оид қатламларида Панамадан оқиб келган моддалар топилмаган.
Олимлар хулосасига кўра, ўрта миоцен даврига оид Панама чўкиндилари 13-15 миллион йил аввал дарё оқимлари орқали Шимолий Америкадаги кичик денгизлар ҳавзасига оқиб келган. Бу эса, Тинч ва Атлантика океанларини бирлаштирувчи бўғоз айнан шу даврда йўқолганини билдиради.
Тадқиқотчилар хулосаси Кариб денгизи ва Тинч океани сувлари ўртасидаги фаол алмашинув тахминан 11 миллион йил аввал тўхтаб қолгани ҳақидаги бошқа тадқиқот маълумотларига мос келади.
Тадқиқот муаллифларининг қайд этишларича, агар уларнинг хулосалари тўлиқ исботланадиган бўлса, мутахассислар ўрганилаётган ҳудуддаги иқлим ўзгаришлари сабабларига қарашларини қайта кўриб чиқишлари керак бўлади.
Изоҳ (0)