2015-yil 1-aprel – fuqarolar uchun 2014-yilgi jami daromadlari to‘g‘risidagi deklaratsiyalarni doimiy yashash joyidagi davlat soliq xizmati organiga taqdim etish muddatining oxirgi kuni, deya xabar bermoqda O‘zbekiston Respublikasi Davlat soliq qo‘mitasi axborot xizmati.
O‘zbekiston Respublikasi Soliq kodeksining 189-moddasiga asosan jismoniy shaxslar 2014-yilgi:
— mulkiy daromadlari, shuningdek fan, adabiyot va san’at asarlarini yaratganlik hamda ulardan foydalanganlik uchun mualliflik haqi tariqasida olingan daromadlari (agar bu daromadlarga to‘lov manbaida soliq solinmagan bo‘lsa);— asosiy bo‘lmagan ish joyidan olingan moddiy naf tarzidagi daromadlari;— ikki yoki undan ko‘p manbadan olingan daromadlari;— O‘zbekiston Respublikasi hududidan tashqaridagi manbalardan olingan daromadlari hamda,— soliq agentlari bo‘lmagan manbalardan olgan daromadlari yuzasidan 2015-yilning 1-apreliga qadar jami yillik daromadlari to‘g‘risida deklaratsiya taqdim etishlari lozim.
Jismoniy shaxslar jami yillik daromadlari to‘g‘risidagi deklaratsiyani doimiy yashash joyidagi davlat soliq xizmati organiga:
— shaxsan tashrif buyurgan holda;— pochta xizmatidan foydalanib, buyurtma xat orqali;— Davlat soliq qo‘mitasining maxsus interaktiv xizmatidan foydalangan holda elektron shaklida taqdim etishlari mumkin.
Agar, jismoniy shaxslar jami yillik daromadlari to‘g‘risidagi deklaratsiyani taqdim etmasa, o‘z vaqtida taqdim etmasa yoki unda atayin noto‘g‘ri ma’lumotlarni ko‘rsatgan holda taqdim etsa, ularga nisbatan O‘zbekiston Respublikasi Ma’muriy javobgarlik to‘g‘risidagi kodeksining 174-moddasi 3-qismiga asosan jarima solishga sabab bo‘ladi.
Soliq deklaratsiyalarini taqdim etmagan fuqarolarga nisbatan qo‘llanilgan ushbu ma’muriy jazo choralari, ularni tegishli davlat soliq xizmati organlariga jami yillik daromadlari to‘g‘risidagi deklaratsiyalarni taqdim etish majburiyatidan ozod qilmaydi.
Shu bilan birga, agar fuqaro daromadlari to‘g‘risidagi deklaratsiyani taqdim etmagan bo‘lsa, davlat soliq xizmati organi o‘zidagi mavjud ma’lumotlar asosida soliq summasini eng yuqori stavka bo‘yicha hisoblab chiqarib, fuqaroga to‘lanishi lozim bo‘lgan hisoblangan soliq summasi to‘g‘risida bildirishnoma topshirishga haqlidir.
Izoh (0)