Ўзбекистон фуқаролари 1 апрелгача йиллик даромад ҳақида декларация топшириши лозим

2015 йил 1 апрель – фуқаролар учун 2014 йилги жами даромадлари тўғрисидаги декларацияларни доимий яшаш жойидаги давлат солиқ хизмати органига тақдим этиш муддатининг охирги куни, дея хабар бермоқда Ўзбекистон Республикаси Давлат солиқ қўмитаси ахборот хизмати.

Ўзбекистон Республикаси Солиқ кодексининг 189-моддасига асосан жисмоний шахслар 2014 йилги:

— мулкий даромадлари, шунингдек фан, адабиёт ва санъат асарларини яратганлик ҳамда улардан фойдаланганлик учун муаллифлик ҳақи тариқасида олинган даромадлари (агар бу даромадларга тўлов манбаида солиқ солинмаган бўлса);— асосий бўлмаган иш жойидан олинган моддий наф тарзидаги даромадлари;— икки ёки ундан кўп манбадан олинган даромадлари;— Ўзбекистон Республикаси ҳудудидан ташқаридаги манбалардан олинган даромадлари ҳамда,— солиқ агентлари бўлмаган манбалардан олган даромадлари юзасидан 2015 йилнинг 1 апрелига қадар жами йиллик даромадлари тўғрисида декларация тақдим этишлари лозим.

Жисмоний шахслар жами йиллик даромадлари тўғрисидаги декларацияни доимий яшаш жойидаги давлат солиқ хизмати органига:

— шахсан ташриф буюрган ҳолда;— почта хизматидан фойдаланиб, буюртма хат орқали;— Давлат солиқ қўмитасининг махсус интерактив хизматидан фойдаланган ҳолда электрон шаклида тақдим этишлари мумкин.

Агар, жисмоний шахслар жами йиллик даромадлари тўғрисидаги декларацияни тақдим этмаса, ўз вақтида тақдим этмаса ёки унда атайин нотўғри маълумотларни кўрсатган ҳолда тақдим этса, уларга нисбатан Ўзбекистон Республикаси Маъмурий жавобгарлик тўғрисидаги кодексининг 174-моддаси 3-қисмига асосан жарима солишга сабаб бўлади.

Солиқ декларацияларини тақдим этмаган фуқароларга нисбатан қўлланилган ушбу маъмурий жазо чоралари, уларни тегишли давлат солиқ хизмати органларига жами йиллик даромадлари тўғрисидаги декларацияларни тақдим этиш мажбуриятидан озод қилмайди.

Шу билан бирга, агар фуқаро даромадлари тўғрисидаги декларацияни тақдим этмаган бўлса, давлат солиқ хизмати органи ўзидаги мавжуд маълумотлар асосида солиқ суммасини энг юқори ставка бўйича ҳисоблаб чиқариб, фуқарога тўланиши лозим бўлган ҳисобланган солиқ суммаси тўғрисида билдиришнома топширишга ҳақлидир.