«ТВЦ» телеканали сиёсатчи Борис Немцовнинг Москва марказида ўлдирилишини муҳрлаган кузатув камераси ёзувини эълон қилди, дея хабар бермоқда «Российская газета». Видеода автомобиллар ва одамлар силуэтларини ажратиш мумкин.
Видеода Борис Немцовнинг ҳамроҳи Анна Дурицкая билан кўприк бўйлаб юрганини кўриш мумкин. Бу орада ўчиб-ёнувчи чироқлари бор тозалаш машинаси уларга етиб олади ва уларни камерадан тўсиб қўяди. Бир неча сониядан сўнг у ердан яна бир киши кўчага югуриб чиқади ва автомобилга ўтириб жўнаб кетади.
Қор тозалаш машинаси воқеа жойидан бир неча метр нарида тўхтаб туради. У ерда битта силуэт — тахминларга кўра, Немцовнинг ҳамроҳи қолади. Шундан сўнг у ҳайдовчиларга яқинлашади ва бир неча дақиқа давомида қор тозалаш машинаси ортида туради.
Бу пайтда кўприкдан ҳали-ҳамон пиёдалар ўтиб туради. Телеканал сюжетида таъкидланишича, баъзилар ҳеч нарса бўлмагандек ўтиб кетса, бошқалари қизиқиб, тўхтаган. Бир киши Немцов ҳалок бўлган жойни кўздан кечириб, қор тозалаш машинасига югуриб келади, қиз ҳам машина ёнида турган эди, сўнг яна жасад ёнига қайтади.
23:35 да (Москва вақти билан) бу ерда биринчи автомобиль тўхтайди ва бир неча сониядан сўнг яна жўнаб кетади. Қиз воқеа жойига қайтади, шундан сўнг яна икки киши келади. 23:37 да яна бир машина ўтиб кетади, бироқ кескин тўхтаб, яна ортига қайтади. Бир қанча вақт давомида у жиноят жойи қаршисида туради.
23:42 да сиёсатчи ҳалок бўлган жойга полиция ходимлари етиб келади. Кўприк тагидан аввалроқ қочиб қолган деб тахмин этилаётган икки киши чиқиб келади.
Эслатиб ўтамиз, Борис Немцов Москва вақти билан 27 февраль 23:15 да (Тошкент вақти билан 28 февраль 01:15 да) Москва марказидаги Москворецкий кўпригида отиб ўлдирилди.
Ички ишлар вазирлиги расмий вакили сўзларига кўра, Немцов қиз дўсти билан кўприкдан ўтаётган маҳал оқ рангли машинадан унга қарата олтита ўқ отилган. Шулардан тўрттаси мухолифатчига келиб теккан. Қотиллик чоғида сиёсатчининг ёнида бўлган қиз жабрланмаган.
Изоҳ (0)