O‘zbekiston hukumati 1941—1945-yillardagi urush va mehnat fronti faxriylarini ijtimoiy qo‘llab-quvvatlashni yanada kuchaytirish chora-tadbirlarini tasdiqladi (pdf).
Vazirlar Mahkamasi qaroriga muvofiq, 2015-yil 1-martdan boshlab urush va mehnat fronti faxriylariga 2015-yil uchun sog‘lomlashtirishga yo‘llanmalar beriladi. Buning uchun faxriylar tuman yoki shahar bandlikka ko‘maklashish va aholini ijtimoiy muhofaza qilish markaziga ariza, pasport nusxasi, urush faxriysi guvohnomasi yoki mehnat frontida qatnashganlik to‘g‘risidagi hujjat nusxasi, shuningdek sog‘lomlashtirishning tavsiya etilgan yo‘nalishi va mavjud zid ko‘rsatmalar yozilgan sanatoriy-kurort kartasini taqdim etishi lozim.
Urush va mehnat fronti faxriylari o‘zlari uchun maqbul muddatlarda yiliga bir marta O‘zbekiston Respublikasi Mehnat va aholini ijtimoiy muhofaza qilish vazirligi, O‘zbekiston Kasaba uyushmalari Federatsiyasi Kengashi hamda davlat va xo‘jalik boshqaruvi organlari sanatoriylarida o‘n ikki kunlik sog‘lomlashtirish kursidan tekin o‘tish huquqiga ega.
1-guruh nogironligi bo‘lgan urush va mehnat fronti faxriylari bir nafar kuzatuvchi shaxs uchun qo‘shimcha tekin yo‘llanma olish huquqiga ega.
Faxriylarning boshqa toifalari ushbu sanatoriyda bo‘sh o‘rin mavjud bo‘lgan taqdirda kuzatuvchi shaxs uchun to‘lov asosida qo‘shimcha yo‘llanma olish huquqiga ega.
Urush va mehnat fronti faxriylarini sog‘lomlashtirish amalga oshiriladigan sanatoriylar ro‘yxati Sog‘liqni saqlash vazirligi, O‘zbekiston Kasaba uyushmalari Federatsiyasi Kengashi hamda “Nuroniy” jamg‘armasi tomonidan belgilanadi.
Izoh (0)