Ўзбекистон ҳукумати 1941—1945 йиллардаги уруш ва меҳнат фронти фахрийларини ижтимоий қўллаб-қувватлашни янада кучайтириш чора-тадбирларини тасдиқлади (pdf).

Вазирлар Маҳкамаси қарорига мувофиқ, 2015 йил 1 мартдан бошлаб уруш ва меҳнат фронти фахрийларига 2015 йил учун соғломлаштиришга йўлланмалар берилади. Бунинг учун фахрийлар туман ёки шаҳар бандликка кўмаклашиш ва аҳолини ижтимоий муҳофаза қилиш марказига ариза, паспорт нусхаси, уруш фахрийси гувоҳномаси ёки меҳнат фронтида қатнашганлик тўғрисидаги ҳужжат нусхаси, шунингдек соғломлаштиришнинг тавсия этилган йўналиши ва мавжуд зид кўрсатмалар ёзилган санаторий-курорт картасини тақдим этиши лозим.

Уруш ва меҳнат фронти фахрийлари ўзлари учун мақбул муддатларда йилига бир марта Ўзбекистон Республикаси Меҳнат ва аҳолини ижтимоий муҳофаза қилиш вазирлиги, Ўзбекистон Касаба уюшмалари Федерацияси Кенгаши ҳамда давлат ва хўжалик бошқаруви органлари санаторийларида ўн икки кунлик соғломлаштириш курсидан текин ўтиш ҳуқуқига эга.

1-гуруҳ ногиронлиги бўлган уруш ва меҳнат фронти фахрийлари бир нафар кузатувчи шахс учун қўшимча текин йўлланма олиш ҳуқуқига эга.

Фахрийларнинг бошқа тоифалари ушбу санаторийда бўш ўрин мавжуд бўлган тақдирда кузатувчи шахс учун тўлов асосида қўшимча йўлланма олиш ҳуқуқига эга.

Уруш ва меҳнат фронти фахрийларини соғломлаштириш амалга ошириладиган санаторийлар рўйхати Соғлиқни сақлаш вазирлиги, Ўзбекистон Касаба уюшмалари Федерацияси Кенгаши ҳамда «Нуроний» жамғармаси томонидан белгиланади.