Ijtimoiy tarmoqlar foydalanuvchilari Checheniston poytaxti Grozniy shahrida portlash va otishmalar ro‘y bergani haqida xabarlar tarqatdi. Shaharda kezib yurgan bronetexnika rasmlari chop etildi. Jangarilarning uch-to‘rtta mashinada taxminan o‘n kishi bo‘lib kelgani ma’lum qilinmoqda.

Checheniston rahbari Ramzan Qodirov o‘zining Facebook’dagi sahifasida vaziyatga oydinlik kiritib, ba’zi tafsilotlarni ma’lum qildi.

“Grozniyda shubhali qurollangan kishilar paydo bo‘ldi. Huquqni himoya qilish organlarining barchasiga ular haqida xabar jo‘natildi. Yo‘l-patrul xizmati xodimlari mashinani to‘xtatishga uringanida, ularga qarata o‘t ochildi, natijada uch nafar xodim halok bo‘ldi”, — deyiladi xabarda.

Qodirovning qayd etishicha, ta’qib qilish davomida taxminan besh-olti nafar bandit shahardagi matbuot uyiga kirib olgan. Ularni qurolsizlantirish choralari ko‘rilmoqda. Shaharda vaziyat tinchlangan, operatsiya tongda yakunlanadi.

Checheniston rahbari shahar fuqarolaridan operatsiya o‘tkazilayotgan hududda ogoh bo‘lib yurishni, kuchli zarurat bo‘lmasa, ko‘chaga chiqmaslikni, derazalarga yaqinlashmaslikni so‘rab qoldi. O‘z xabari yakunida Qodirov shubhali shaxslarning boshqa mintaqadan kelganini taxmin qildi.