Rossiyaliklar fikricha, prezident Vladimir Putin mamlakatdagi voqealarga katta ta’sir o‘tkazmoqda, ular uning davlat rahbari lavozimidagi xatti-harakatlarini qo‘llab-quvvatlaydi va kelajakda ham uni ushbu lavozimda ko‘rishni xohlaydi. Bu haqda “Levada-Markaz” so‘rovi natijalariga tayanib, Interfax xabar berdi.
Jamiyatshunoslarning “Siz Putinni 2018-yilda — uning hozirgi prezidentlik muddati tugaganidan keyin ham Rossiya prezidenti lavozimida ko‘rishni xohlarmidingiz?” savoliga so‘rovda ishtirok etganlarning 58 foizi tasdiq javobini berdi, 19 foizi rad javobini taqdim etgan bo‘lsa, 22 foizi javob berishga qiynaldi.
Bundan tashqari, so‘rovnoma qatnashchilarining 34 foizi Rossiyada yaqin to‘rt yil ichida prezidentlik lavozimida Putinning o‘rnini bosa oladigan yangi yetakchi paydo bo‘lishiga ishonch bildirdi, 31 foizi buni shubha ostiga oldi, 35 foizi esa savolga javob berishga qiynaldi.
Putinning Rossiya davlati rahbari sifatidagi faoliyatini 72 foiz respondentlar qo‘llab-quvvatlaydi, ularning 13 foizi qarshi chiqadi. So‘ralganlarning har o‘ninchisi Putinni yaxshi bilmasligini aytdi.
Umuman olganda, Putin Rossiya prezidentligiga ilk marotaba saylanganidan buyon, so‘rov ishtirokchilarining 74 foizida u haqda asosan ijobiy taassurotlar shakllangan, 13 foizida esa salbiy taassurot qolgan.
Putinning Rossiyada bo‘layotgan voqealarga ta’sirini baholar ekan, so‘rovda qatnashganlarning 71 foizi uni kuchli deb atadi, shu jumladan 24 foizi “juda kuchli” deb e’tirof etdi. Uning ta’sirini o‘rtacha deb baholaganlar 19 foizni, kuchsiz deb ataganlar esa 5 foizni tashkil etdi.
So‘rov 21—24-noyabr kunlari Rossiya Federatsiyasining 46 ta subyektidagi 134 ta aholi punktlarida 1600 nafar fuqaro o‘rtasida o‘tkazildi.
Izoh (0)