Ижтимоий тармоқлар фойдаланувчилари Чеченистон пойтахти Грозний шаҳрида портлаш ва отишмалар рўй бергани ҳақида хабарлар тарқатди. Шаҳарда кезиб юрган бронетехника расмлари чоп этилди. Жангариларнинг уч-тўртта машинада тахминан ўн киши бўлиб келгани маълум қилинмоқда.
Чеченистон раҳбари Рамзан Қодиров ўзининг Facebook’даги саҳифасида вазиятга ойдинлик киритиб, баъзи тафсилотларни маълум қилди.
«Грознийда шубҳали қуролланган кишилар пайдо бўлди. Ҳуқуқни ҳимоя қилиш органларининг барчасига улар ҳақида хабар жўнатилди. Йўл-патрул хизмати ходимлари машинани тўхтатишга уринганида, уларга қарата ўт очилди, натижада уч нафар ходим ҳалок бўлди», — дейилади хабарда.
Қодировнинг қайд этишича, таъқиб қилиш давомида тахминан беш-олти нафар бандит шаҳардаги матбуот уйига кириб олган. Уларни қуролсизлантириш чоралари кўрилмоқда. Шаҳарда вазият тинчланган, операция тонгда якунланади.
Чеченистон раҳбари шаҳар фуқароларидан операция ўтказилаётган ҳудудда огоҳ бўлиб юришни, кучли зарурат бўлмаса, кўчага чиқмасликни, деразаларга яқинлашмасликни сўраб қолди. Ўз хабари якунида Қодиров шубҳали шахсларнинг бошқа минтақадан келганини тахмин қилди.
Изоҳ (0)