Россияликлар фикрича, президент Владимир Путин мамлакатдаги воқеаларга катта таъсир ўтказмоқда, улар унинг давлат раҳбари лавозимидаги хатти-ҳаракатларини қўллаб-қувватлайди ва келажакда ҳам уни ушбу лавозимда кўришни хоҳлайди. Бу ҳақда «Левада-Марказ» сўрови натижаларига таяниб, Interfax хабар берди.
Жамиятшуносларнинг «Сиз Путинни 2018 йилда — унинг ҳозирги президентлик муддати тугаганидан кейин ҳам Россия президенти лавозимида кўришни хоҳлармидингиз?» саволига сўровда иштирок этганларнинг 58 фоизи тасдиқ жавобини берди, 19 фоизи рад жавобини тақдим этган бўлса, 22 фоизи жавоб беришга қийналди.
Бундан ташқари, сўровнома қатнашчиларининг 34 фоизи Россияда яқин тўрт йил ичида президентлик лавозимида Путиннинг ўрнини боса оладиган янги етакчи пайдо бўлишига ишонч билдирди, 31 фоизи буни шубҳа остига олди, 35 фоизи эса саволга жавоб беришга қийналди.
Путиннинг Россия давлати раҳбари сифатидаги фаолиятини 72 фоиз респондентлар қўллаб-қувватлайди, уларнинг 13 фоизи қарши чиқади. Сўралганларнинг ҳар ўнинчиси Путинни яхши билмаслигини айтди.
Умуман олганда, Путин Россия президентлигига илк маротаба сайланганидан буён, сўров иштирокчиларининг 74 фоизида у ҳақда асосан ижобий таассуротлар шаклланган, 13 фоизида эса салбий таассурот қолган.
Путиннинг Россияда бўлаётган воқеаларга таъсирини баҳолар экан, сўровда қатнашганларнинг 71 фоизи уни кучли деб атади, шу жумладан 24 фоизи «жуда кучли» деб эътироф этди. Унинг таъсирини ўртача деб баҳолаганлар 19 фоизни, кучсиз деб атаганлар эса 5 фоизни ташкил этди.
Сўров 21—24 ноябрь кунлари Россия Федерациясининг 46 та субъектидаги 134 та аҳоли пунктларида 1600 нафар фуқаро ўртасида ўтказилди.
Изоҳ (0)