Janubiy Koreyaning Incheon shahrida o‘tkazilayotgan ParaOsiyo o‘yinlarida O‘zbekiston sportchilari sovrinli o‘rinlarni qo‘lga kiritishda davom etmoqda, deya xabar berdi Milliy Olimpiya qo‘mitasi. Bugun, 22-oktabr kuni ertalabki dasturning o‘zida o‘zbekistonliklar yana to‘rtta medalni delegatsiya hisobiga qo‘shib qo‘ydi.
Dzyudo kurashi bo‘yicha o‘tkazilgan musobaqalarda Shuhrat Boboyev (-90 kg) hamda Odil Tulendiboyev (+100 kg) barcha raqiblari ustidan g‘alabaga erishib, oltin medalga sazovor bo‘ldi.
Jumladan, Shuhrat Boboyev chorak finalda Eron vakilini, yarim final bahsida esa mo‘g‘ulistonlik sportchini yengib, hal qiluvchi final bellashuvida yaponiyalik Aramitsu Kitazononi 3 daqiqa-yu 11 soniyada ippon bahosi bilan muddatdan avval mag‘lub etdi.
Og‘ir vazndagi polvonlar o‘rtasida jahon chempioni Odilbek Tulendiboyev o‘z vaznida Osiyoning tengsiz polvoni ekanligini amalda isbotladi. Chorak finalda Tailand vakilini yenggan Odil, yarim finalda yaponiyalik Kento Mosaki ustidan g‘alabaga erishdi. Hal qiluvchi final bellashuvida esa eronlik Hamza Nadrini mag‘lub etish uchun hamyurtmizga 19 soniya kifoya qildi.
Dzyudo kurashi bo‘yicha o‘tkazilgan musobaqalarda, shuningdek, Gulruh Rahimova (-70 kg) kumush, Shirin Sharipov (-100 kg) esa bronza medaliga sazovor bo‘ldi.
Ayni daqiqalarga kelib delegatsiyamiz hisobida 18 ta oltin, 3 ta kumush va 2 ta bronza medali mavjud va hamyurtlarimiz umumjamoa hisobida 4-o‘rinda borishyapti.
Izoh (0)