Жанубий Кореянинг Инчеон шаҳрида ўтказилаётган ПараОсиё ўйинларида Ўзбекистон спортчилари совринли ўринларни қўлга киритишда давом этмоқда, дея хабар берди Миллий Олимпия қўмитаси. Бугун, 22 октябрь куни эрталабки дастурнинг ўзида ўзбекистонликлар яна тўртта медални делегация ҳисобига қўшиб қўйди.
Дзюдо кураши бўйича ўтказилган мусобақаларда Шуҳрат Бобоев (-90 кг) ҳамда Одил Тулендибоев (+100 кг) барча рақиблари устидан ғалабага эришиб, олтин медалга сазовор бўлди.
Жумладан, Шуҳрат Бобоев чорак финалда Эрон вакилини, ярим финал баҳсида эса мўғулистонлик спортчини енгиб, ҳал қилувчи финал беллашувида япониялик Арамицу Китазонони 3 дақиқа-ю 11 сонияда иппон баҳоси билан муддатдан аввал мағлуб этди.
Оғир вазндаги полвонлар ўртасида жаҳон чемпиони Одилбек Тулендибоев ўз вазнида Осиёнинг тенгсиз полвони эканлигини амалда исботлади. Чорак финалда Таиланд вакилини енгган Одил, ярим финалда япониялик Кенто Мосаки устидан ғалабага эришди. Ҳал қилувчи финал беллашувида эса эронлик Ҳамза Надрини мағлуб этиш учун ҳамюртмизга 19 сония кифоя қилди.
Дзюдо кураши бўйича ўтказилган мусобақаларда, шунингдек, Гулруҳ Раҳимова (-70 кг) кумуш, Ширин Шарипов (-100 кг) эса бронза медалига сазовор бўлди.
Айни дақиқаларга келиб делегациямиз ҳисобида 18 та олтин, 3 та кумуш ва 2 та бронза медали мавжуд ва ҳамюртларимиз умумжамоа ҳисобида 4-ўринда боришяпти.
Изоҳ (0)