Joriy yilning 18—24-oktabr kunlari Janubiy Koreyaning Incheon shahrida jismoniy imkoniyati cheklangan sportchilar o‘rtasida ParaOsiyo o‘yinlari o‘tkaziladi. Mazkur musobaqalarda O‘zbekiston sharafini 27 nafar sportchimiz dzyudo, suzish, yengil atletika va o‘q otish sport turlari bo‘yicha o‘tkaziladigan bahslarda himoya qiladi, deya xabar bermoqda Milliy olimpiya qo‘mitasi rasmiy sayti.
16-oktabr kuni ParaOsiyo o‘yinlari ishtirokchilari istiqomat qilayotgan atletlar shaharchasida O‘zbekiston bayrog‘i ko‘tarilishiga bag‘ishlangan tadbir bo‘lib o‘tdi. Ushbu marosimda mamlakatimiz delegatsiyasi hamda Osiyo o‘yinlarining tashkiliy qo‘mitasi a’zolari ishtirok etdi.
ParaOsiyo o‘yinlarining tantanali ochilish marosimi esa 18-oktabr kuni Incheon shahridagi “Munxak” stadionida mahalliy vaqt bilan soat 17:45 da (Toshkent vaqti bilan soat 13:45 da) boshlanadi.
Eslatib o‘tamiz, mazkur ParaOsiyo o‘yinlarida 2016-yili Rio-de-Janeyro shahri (Braziliya)da o‘tkaziladigan Paralimpiya o‘yinlarining litsenziyalari o‘ynaladi.
Izoh (0)