Apple kompaniyasi bugun, 16-oktabr kuni bo‘lib o‘tadigan tadbiridan oldin noodatiy, qo‘pol xatoga yo‘l qo‘ydi. Kompaniya yangi iPad Air 2 va iPad mini 3 planshetlarining suratlarini xato tufayli taqdimotdan oldin e’lon qilib yubordi. Bu haqda The Verge ma’lumotiga asoslanib “Parol” nashri xabar berdi.
Yangi iPad planshetlarida iOS 8 operatsion tizimidan foydalanishning rasmiy yo‘riqnomasi suratlari iTunes Store’da paydo bo‘ldi. Suratning sifatli turi esa hali ham Apple serverlarida saqlanib turibdi.
Yo‘riqnomada hali taqdim etilmagan iPad Air 2 va iPad mini 3 planshetlarining suratlari mavjud. Ularning har ikkalasida ham TouchID — barmoq izi sensori o‘rnatilgan. Ta’kidlab o‘tish joiz, ushbu gadjetlardan avval ishlab chiqarilgan Apple planshetlarida TouchID funksiyasi yo‘q edi.
Yangi iPad planshetlari avvalgilari bilan bir xil dizaynda. Shuningdek, yo‘riqnomadan ko‘rish mumkinki, iPad Air 2 planshetida Burst Mode — seriyali suratga olish funksiyasi mavjud, ammo iPad mini 3’da ham ushbu funksiya bo‘lishi haqida ma’lumot berilmagan.
Eslatib o‘tamiz, bugun Apple’ning rasman tasdiqlangan tadbiri bo‘lib o‘tadi. Unda ilk tilla rangli iPad planshetlari, Retina displeyli iMac kompyuterlari va Mac kompyuterlari uchun mo‘ljalangan OS X operatsion tizimining yangi versiyasi taqdim etilishi kutilmoqda.
Shuningdek, 15-oktabr kuni Google kompaniyasi Android’ning yangi Lollipop versiyasi hamda Nexus 6 smartfoni va Nexus 9 planshetlarini rasman taqdim etdi.
Izoh (0)