Google kompaniyasi Yerning olis va nochor mintaqalariga yuqori tezlikli internetni doimiy ravishda yetkazib beruvchi ilk aerostat (havo shari)larni kelasi yilda ishga tushirmoqchi. Bu haqda Project Loon loyihasi rahbari Astro Tellerga tayanib The Wall Street Journal nashri xabar bermoqda.
Project Loon loyihasi yer usti baza stansiyasi (mahalliy internet-provayder tomonidan xizmat ko‘rsatiladi), havo sharlaridagi tarmoq qurilmasi, fuqarolarning uylaridagi antennalardan iborat tarmoqni yaratishni ko‘zda tutadi. Har bir shar 40 kilometr diametrdagi hududga simsiz internet tarqatish imkoniyatiga ega. Aerostatlar taxminan 20 km balandlikda joylashadi va shu tariqa tijoriy avialaynerlar parvoziga xalal bermaydi.
Bugungi kungacha, Google ushbu texnologiyalarni Yangi Zelandiya, Braziliya hamda AQShning ba’zi shtatlaridan sinovdan o‘tkazdi. Braziliyadagi sinov chog‘ida kompaniya yer ustidagi antennalarga soniyasiga 22 megabit, smartfonlarga esa bir soniyada 5 megabit tezlikda axborot uzatishga muvaffaq bo‘lishganini ma’lum qildi.
Google X maxfiy laboratoriyasi o‘tgan yilning iyunida Project Loon loyihasi haqida ommaga ma’lum qilgan edi. Uning yordamida kompaniya butun sayyorani, shu jumladan qishloq joylar, cho‘llar, dengiz va boshqa olis hududlarni internet bilan ta’minlamoqchi.
Izoh (0)