Xitoy hukumati Apple kompaniyasining iPhone 6 va iPhone 6 Plus telefonlarini sotishga ruxsat berdi, deya xabar bermoqda South China Morning Post.
Xitoy Xalq Respublikasi Sanoat va axborot texnologiyalari vazirligi 30-sentabr kuni Amerika kompaniyasiga iPhone 6’ni mamlakatdagi simsiz tarmoqlarda ishlatish uchun litsenziya berganini e’lon qildi. Ta’kidlanishicha, bundan avval “puxta sinovlar” hamda Apple bilan muzokaralar o‘tkazilgan. Kompaniya xavfsizlik masalalari yuzasidan vazirlikka barcha texnik hujjatlarni taqdim etgan. Xitoy vazirligidagi shubha iPhone 6’da mavjud bo‘lgan tashxis vositasi bilan bog‘liq bo‘lgan.
iPhone 6 va iPhone 6 Plus 19-sentabrdan AQSh, Kanada, Buyuk Britaniya, Fransiya, Germaniya, Avstraliya, Gonkong, Singapur va Yaponiyadagi to‘qqizta do‘konda sotila boshladi. 26-sentabrdan yangi qurilmalar yana 20 ta mamlakat do‘konlarida paydo bo‘ldi.
Xitoyda esa zarur ruxsatnomalar bo‘lmagani uchun smartfonlar savdosi kechiktirildi, bu mamlakatga smartfonlarning noqonuniy keltirilib, o‘ta baland narxlarda sotilishiga sabab bo‘ldi.
Apple kompaniyasi vakillari yangi qurilmalar Xitoyda 17-oktabrdan savdoga chiqishini ma’lum qildi.