Donetskdagi otishmalar natijasida Qizil Xoch Xalqaro Qo‘mitasi vakili, Shveysariya fuqarosi Loran Etyen halok bo‘ldi. Bu haqda Euronews xabar berdi. Snaryad shahar markazidagi “Qizil Xoch” bosh ofisiga kelib tushdi.
Ukraina tashqi ishlar vaziri Pavel Klimkin o‘z Tvitterida otishmada ayirmachilarni aybladi.
“Donetsk xalq respublikasi” vakillarining ta’kidlashicha, snaryad Donetsk markazini o‘qqa tutayotgan Ukraina kuchlari tomonidan otilgan.
Avvalroq Yevroittifoq sentabr boshida tuzilgan yarash sulhiga qaramay, yangi otishmalar sodir bo‘layotganidan xavotir bildirgan edi. 1-oktabr kuni Donetskning o‘qqa tutilishi natijasida o‘n kishi qurbon bo‘lgan.
Donetsk aeroporti uchun ham janglar bo‘lib o‘tmoqda. Shahar rossiyaparast ayirmachilar nazorati ostida bo‘lgan bir paytda, aeroport Ukraina qo‘shinlari qo‘lida qolmoqda.
Yevropa manbalarining ma’lumotlariga ko‘ra, aeroport ayirmachilar tomonidan qo‘lga olinsa, YeI Rossiyaga qarshi yangi sanksiyalarni qo‘llashi mumkin.
Izoh (0)