Донецкдаги отишмалар натижасида Қизил Хоч Халқаро Қўмитаси вакили, Швейцария фуқароси Лоран Этьен ҳалок бўлди. Бу ҳақда Euronews хабар берди. Снаряд шаҳар марказидаги «Қизил Хоч» бош офисига келиб тушди.
Украина ташқи ишлар вазири Павел Климкин ўз Твиттерида отишмада айирмачиларни айблади.
«Донецк халқ республикаси» вакилларининг таъкидлашича, снаряд Донецк марказини ўққа тутаётган Украина кучлари томонидан отилган.
Аввалроқ Евроиттифоқ сентябрь бошида тузилган яраш сулҳига қарамай, янги отишмалар содир бўлаётганидан хавотир билдирган эди. 1 октябрь куни Донецкнинг ўққа тутилиши натижасида ўн киши қурбон бўлган.
Донецк аэропорти учун ҳам жанглар бўлиб ўтмоқда. Шаҳар россияпараст айирмачилар назорати остида бўлган бир пайтда, аэропорт Украина қўшинлари қўлида қолмоқда.
Европа манбаларининг маълумотларига кўра, аэропорт айирмачилар томонидан қўлга олинса, ЕИ Россияга қарши янги санкцияларни қўллаши мумкин.
Изоҳ (0)