Microsoft kompaniyasi asoschilaridan biri Bill Geyts Forbes jurnalining eng saxiy amerikalik milliarderlar ro‘yxatiga yetakchilik qildi. Bu haqda “ITAR-TASS” xabar berdi.
Nashr ma’lumotlariga ko‘ra, o‘tgan yili Geyts xayriya ishlariga 2,65 milliard dollar sarflagan. Mablag‘ning katta qismini u bezgak, poliomiyelit va boshqa xavfli kasalliklarga qarshi kurash uchun xayriya qildi.
Forbes versiyasiga ko‘ra, 81,2 milliard dollarlik davlatga egalik qiluvchi Geyts, ketma-ket 21 yildan buyon AQShdagi eng boy kishi bo‘lib kelmoqda, shu yilning mart oyida esa jurnal uni sayyoradagi eng badavlat odam deb ham e’tirof etdi.
O‘z umri davomida milliarder turli xayriya tashkilotlariga 30 milliard dollardan ortiq mablag‘ sarfladi, bu uning joriy davlatining deyarli 40 foizini tashkil etadi.
Eng saxiy amerikalik milliarderlar ro‘yxatida ikkinchi pog‘onani investor Uorren Baffet egalladi. 2013-yilda u xayriya maqsadlariga Geytsdan sal kamroq — 2,63 milliard dollar sarfladi. O‘z pullarining katta qismini investor Bill va Melinda Geytsning o‘zi vasiylik qiladigan oilaviy xayriya fondiga yo‘naltirdi.
Reytingning keyingi o‘rinlarini “Este Lauder” Amerika kosmetika imperiyasi merosxo‘ri Leonard Lauder (1,1 milliard dollar), Facebook asoschisi Mark Sukerberg (991 million dollar), moliyachi Jorj Soros (734 million dollar) egalladi.
Izoh (0)