Билл Гейтс хайрия учун 2,65 млрд доллар сарфлаб, энг сахий америкалик миллиардер деб тан олинди

Microsoft компанияси асосчиларидан бири Билл Гейтс Forbes журналининг энг сахий америкалик миллиардерлар рўйхатига етакчилик қилди. Бу ҳақда ИТАР-ТАСС хабар берди.

Нашр маълумотларига кўра, ўтган йили Гейтс хайрия ишларига 2,65 миллиард доллар сарфлаган. Маблағнинг катта қисмини у безгак, полиомиелит ва бошқа хавфли касалликларга қарши кураш учун хайрия қилди.

Forbes версиясига кўра, 81,2 миллиард долларлик давлатга эгалик қилувчи Гейтс, кетма-кет 21 йилдан буён АҚШдаги энг бой киши бўлиб келмоқда, шу йилнинг март ойида эса журнал уни сайёрадаги энг бадавлат одам деб ҳам эътироф этди.

Ўз умри давомида миллиардер турли хайрия ташкилотларига 30 миллиард доллардан ортиқ маблағ сарфлади, бу унинг жорий давлатининг деярли 40 фоизини ташкил этади.

Энг сахий америкалик миллиардерлар рўйхатида иккинчи поғонани инвестор Уоррен Баффет эгаллади. 2013 йилда у хайрия мақсадларига Гейтсдан сал камроқ — 2,63 миллиард доллар сарфлади. Ўз пулларининг катта қисмини инвестор Билл ва Мелинда Гейтснинг ўзи васийлик қиладиган оилавий хайрия фондига йўналтирди.

Рейтингнинг кейинги ўринларини «Эсте Лаудер» Америка косметика империяси меросхўри Леонард Лаудер (1,1 миллиард доллар), Facebook асосчиси Марк Цукерберг (991 миллион доллар), молиячи Жорж Сорос (734 миллион доллар) эгаллади.