Xitoyning Xubey provinsiyasida joylashgan Ichan shahrida tovuqlar go‘zallik tanlovi o‘tkazildi. Hakamlar hay’ati tanlovning final bosqichiga yetib kelgan yetti parranda ichidan Mey ismli tovuqni g‘olib deb topdi. Bu haqda Metro nashri xabar bermoqda.
Hakamlar hay’ati finalda ishtirok etgan tovuqlarni patlari qalinligi, tana mutanosibligi, qadam tashlashi va “alohida iste’dodlari”ga qarab baholadi. G‘olib deb topilgan tovuqning egasi Gang Pen o‘zining parrandasida mutlaq go‘zallik aks etganini e’tirof etib, uning g‘alabasidan hayron bo‘lmaganini ma’lum qildi.
Nashrda qayd etilishicha, tovuq zafar quchishiga uning Xitoy xalq qo‘shig‘i ostida ijro etgan raqsi ham sabab bo‘lgan.
Shundan so‘ng, Mey ismli tovuq auksionda 800 dollardan ko‘proq pulga sotildi. Mazkur mablag‘ xayriya ishlari uchun yo‘naltirildi.
Ma’lumot uchun, hayvonlar o‘rtasida go‘zallik tanlovlarini o‘tkazish g‘ayrioddiy hodisa emas. Xususan, avgust oyi o‘rtalarida Yekaterinburgda shunday musobaqa tashkil etilib, eng chiroyli ot aniqlangan edi.
Izoh (0)