“Roskomnadzor” (Rossiya aloqa, axborot texnologiyalari va ommaviy kommunikatsiyalar sohasini nazorat qilish bo‘yicha federal xizmati) Facebook, Gmail va Twitter’ni Rossiyada “axborot tarqatish tashkilotchilari” sifatida ro‘yxatdan o‘tish kerakligi haqida xabardor qildi. Bu haqda idora rahbari o‘rinbosari Maksim Ksenzovga tayanib, “Izvestiya” nashri xabar berdi.
“Biz barchaga bildirishnomalarni jo‘natdik va u yoki bu yo‘l bilan ularni qonunga rioya qilishga majbur qilamiz. Ular o‘zaro konsultatsiyalar olib boradi, Kaliforniya yuridik xizmatlari bilan suhbatlashadi. Biz ham ular bilan konsultatsiyalar olib bormoqdamiz va hozircha ataylab shoshiltirmayapmiz”, — deya ta’kidladi Ksenzov.
Uning aytishicha, agar Amerika internet-servislari Rossiya qonunchiligi talablarini bajarmasa, ularga nisbatan ma’muriy choralar ko‘riladi.
“Ushbu uchta resurs o‘z ma’lumot markazlarini Rossiyada joylashtirish borasida blogerlar haqidagi qonun bo‘yicha qaror qabul qilishi kerak. Ular bunga tayyorlanib, qonunni bajarmoqchi”, — dedi idora boshlig‘i o‘rinbosari.
Ksenzovning aniqlik kiritishicha, Rossiyaning asosiy internet-servislari ro‘yxatdan o‘tib bo‘lgan: “VKontakte”, “Yandeks” servislari, Mail.Ru Group ro‘yxatga kiritilgan, “Habrahabr” blog-servisi esa ro‘yxatdan o‘tish jarayonida turibdi.
Izoh (0)