Putin Assotsiatsiya haqidagi bitimning savdo qismi kechiktirilayotgan 15 oy muddatda hujjat matniga keng ko‘lamdagi o‘zgartirishlar kiritilishini talab qildi. Bu haqda Rossiya prezidentining Yevrokomissiya prezidenti Joze Manuel Barrozuga yozgan maktubida aytiladi, deya xabar bermoqda “Yevropeyskaya pravda” nashri.
“Biz avvalgidek, ushbu hujjat kuchga kirishi natijasida Rossiya-Ukraina iqtisodiy aloqalari va butun Rossiya iqtisodiyotida yuzaga keladigan risklarning barchasini hisobga olgan holda, Assotsiatsiya to‘g‘risidagi bitimga tizimli o‘zgartirishlar kiritishgina bizga Rossiya Federatsiyasi va Ukraina o‘rtasidagi mavjud savdo-iqtisodiy aloqalarni saqlab qolish imkonini beradi, deb hisoblaymiz”, — deb yozadi Putin o‘z maktubida.
U shuningdek, Ukraina qonunlarini YeI qoidalariga moslash maqsadida o‘zgartirish uchun qilingan har qanday qadam kelishuvni buzish hisoblanishi va unga javoban Rossiya choralar ko‘rishi haqida ogohlantirdi.
Yevropa mansabdorlari esa o‘zgartirishlar kiritish mumkin emasligi haqida aytmoqda. YeIning savdo masalalari bo‘yicha komissari Karel de Gyuxtning ta’kidlashicha, kelishuv ortga surilgan muddat davomida Kiyevga o‘z ichki standartlarini tartibga solish taqiqlanmagan.
“Ruslar bunga ‘taym-aut’ sifatida emas, uchinchi tomonni jalb etib, shu tariqa bitimni yo‘q qilish imkoniyati deb qaramoqda”, — deya qo‘shimcha qildi u.
Izoh (0)