O‘zbekiston hukumati Toshkent viloyati davlat pedagogika institutini tugatish haqida qaror qabul qildi, deb yozadi UzDaily.
Ushbu qaror Vazirlar Mahkamasining 18-sentabrdagi “Toshkent viloyatidagi ta’lim muassasalari faoliyatini optimallashtirish va ularning samaradorligini oshirish bo‘yicha chora-tadbirlar to‘g‘risida”gi qaroriga muvofiq qabul qilindi.
Hujjatda ko‘ra, institut bazasida 2014/2015-o‘quv yilidan alohida fanlarni chuqur o‘rgatishga ixtisoslashgan, 540 o‘quvchi o‘rniga ega maktab-internat va O‘zbekiston davlat jahon tillari universiteti qoshidagi Angren akademik litseyi (450 o‘ringa ega) ochiladi.
Ixtisoslashgan maktab-internat Toshkent viloyati mahalliy byudjeti va qonunchilik bilan taqiqlanmagan boshqa manbalar hisobidan moliyalashtiriladi. Akademik litseyni moliyalashtirish esa respublika byudjeti va qonunchilik bilan taqiqlanmagan boshqa manbalar orqali amalga oshiriladi.
Tugatiladigan Toshkent viloyati davlat pedagogika institutining Angren, Bekobod shaharlari, Bekobod, Bo‘ka, Ohangaron va Oqqo‘rg‘on tumanlaridagi axborot-resurs markazlari kasb-hunar kollejlariga beriladi.
Izoh (0)