Yevropa tiklanish va taraqqiyot banki (YeTTB) O‘zbekiston yalpi ichki mahsuloti 2014-yilda 7,5 foizga o‘sishi haqidagi prognozini saqlab qoldi, deya xabar bermoqda “Noviy vek” nashri. Bank bundan avval may oyida shunday prognozini ma’lum qilgan edi.
YeTTB mutaxassislari hisob-kitoblariga ko‘ra, O‘zbekiston iqtisodiyotining o‘sish darajasi 2015-yilda 7,6 foizga teng bo‘ladi.
Bundan tashqari, ular 2014-yilda O‘zbekistondagi inflyatsiya darajasi 11,4 foizni tashkil etishini taxmin qilmoqda. 2013-yilda ushbu ko‘rsatkich 11,2 foizga teng bo‘lgan.
YeTTBning ta’kidlashicha, Rossiyadagi vaziyat O‘zbekiston va Markaziy Osiyodagi boshqa davlatlarning iqtisodiy taraqqiyotiga ta’sir ko‘rsatadi. Xususan, Rossiyadan O‘zbekistonga pul o‘tkazmalari hajmi joriy yilda qisqarmoqda, bu esa respublikadagi iste’molchilar talabini sezilarli ravishda sekinlashtirishi mumkin.
Nashrning eslatishicha, avvalroq O‘zbekiston hukumati YaIM 2014-yilda 8,1 foizga o‘sishini prognoz qilgan edi.
Izoh (0)