Facebook’dagi “Potrebitel.uz” guruhi moderatori maktab sinfxonalarining 40—45 o‘quvchini sig‘dirish-sig‘dirmasligi bilan bog‘liq hujjatni topganini yozib, xabariga uni ilova qildi.
O‘zbekiston Respublikasi Sanitariya qoidalari va me’yorlari (SanPin) doirasida 2000-yilda chiqarilgan ushbu hujjat Umumta’lim maktablarida o‘quvchilarni o‘qitish sharoitlariga gigiyenik talablar deb nomlanadi.
Undagi punktlardan birida qayd etilishicha, kabinetlar maydoni mashg‘ulotlarning frontal shakllarida (sinfdagi butun o‘quv kollektiviga ta’lim berish jarayonida) har bir o‘quvchi uchun 2,5 m² mo‘ljalidan kelib chiqishi kerak. Guruh bo‘lib ishlash va individual mashg‘ulotlarda esa bir o‘quvchiga 3,3 m² maydon hisoblanishi kerak.
“Bundan kelib chiqib, 40 o‘quvchidan iborat sinf uchun mo‘ljallangan o‘quv xonasi 100 m² maydonga ega bo‘lishi kerak”, — deya xulosa qiladi muallif. U bugungi kunda maktabdagi standart sinfxona 60 m², eng katta o‘quv xonalari esa 80 m² atrofida ekanini qayd etdi.
“Demak, bir tomondan, me’yor qoidalarining buzilishi kuzatilmoqda, — deya o‘z fikrida davom etdi foydalanuvchi. — Boshqa tomondan esa, sinflar tarkibini kamaytirish o‘qituvchining bir soatlik bandligi haqidagi qarorga zid kelib qoladi”.
Postga fikr bildirganlar bunday muhim hujjat bilan bo‘lishgani uchun muallifga minnatdorchilik bildirgan. Izoh yozganlarning ba’zilari ota-ona, ba’zilari o‘qituvchi sifatida sinflarda o‘quvchilar sonining me’yordan oshiqligi ayni payda dolzarb muammo bo‘lib turganini qayd etgan.
Muallif ota-onalarni o‘z farzandlarining qonunda belgilangan sharoitlarda ta’lim olishini talab etishga chaqirdi. “Maktab yoki o‘qituvchilardan bunday tashabbus kutmang, o‘z farzandlaringiz uchun o‘zingiz kurashing!” — deya da’vat etdi u.
Izoh (0)