O‘zbekistondagi milliy aloqa operatori “O‘zbektelekom” AK 2015-yilning birinchi yarmida GSM standartidagi yangi uyali aloqa operatorini ishga tushirmoqchi. Bu haqda Aloqa, axborotlashtirish va telekommunikatsion texnologiyalar qo‘mitasi vakili jurnalistlarga ma’lum qildi, deb yozadi “Noviy vek”.
Qo‘mita vakilining aytishicha, iyul oyida uskunalar yetkazib berish bo‘yicha e’lon qilingan yopiq tanlov taqdim etilgan takliflarning tanlov shartlariga to‘g‘ri kelmasligi tufayli bekor qilingan. Shu tufayli GSM-tarmoq bilan bog‘liq rejalar kechiktirilgan.
Endi sentabr oxirida yangi tanlov e’lon qilinadi. Uskuna yetkazib berish esa 2014-yil so‘ngida boshlanadi. Dastlab Toshkentda 2 millionta raqam hajmiga ega tarmoqni yaratish ko‘zda tutilgan.
Xabar qilinishicha, MTS o‘rniga yangi — Universal Mobile Systems'ning ishga tushirilishi Uzmobile'ning tarmoqni kengaytirish rejalariga ta’sir qilmaydi.
Bundan avval 2018-yilgacha “O‘zbеktеlеkom” аksiyadorlik kompaniyasining Uzmobile filiali negizida milliy mobil aloqa operatori tashkil etishi xabar berilgan edi.
Milliy operator tarmog‘ini tashkil etish bo‘yicha chora-tadbirlar jadvalida 2014-yil mobaynida 1020 tayanch stansiyalari, radiorele jihozining 500 komplekti, hamda 2 million raqamga mo‘ljallangan kommutatsiya stansiyasi va billing tizimini o‘rnatish orqali uyali aloqa bilan Toshkent shahrini qoplash ko‘zda tutilgan edi.
2015-yilda milliy operator tarmog‘i bilan barcha viloyatlar markazlari, 2017-yil davomida esa respublikaning barcha aholi puktlarini qoplash rejalashtirilgan.
Izoh (0)