Android platformasida ishlab chiqilgan zamonaviy axborot-kommunikatsiya texnologiyalari (AKT) atamalarining yangi o‘zbekcha-ruscha-inglizcha lug‘ati mobil telefonlar va qurilmalarda keng foydalanish uchun Google Play (Android smartfonlar va planshetlar uchun dasturlarning rasmiy onlayn bozori)ga joylandi. Bu haqda Infocom.uz xabar berdi.
Ushbu AKT lug‘atida axborot kommunikasiya texnologiyalarining turli yo‘nalishlari, jumladan, kompyuterlashtirish va axborotlashtirish, telekommunikatsiya va tarmoq texnologiyalari, dasturiy va uskunaviy ta’minot, elektron hukumat, axborot xavfsizligi, telekommunikatsiya tizimlari, ma’lumotlarni qayta ishlash, masofaviy ta’lim, davlat boshqaruvida AKTdan foydalanish sohalari bo‘yicha 5000 ga yaqin atama va tushunchalar mavjud.
Lug‘atning qulay afzalliklari sifatida, bu resurs hajmining chegaralanmaganligi, foydalanuvchining resursdan masofadan turib va muntazam foydalanish imkoniyati, kerakli atamaning o‘zbek, rus va ingliz tillarida ham alifbo tarzda, ham alohida so‘z sifatida tez qidirish imkoniyati, tushuncha va atamalarning o‘zbek tilidagi (kirill va lotin alifbosida) aniq izohlari berilishi va uning rus va ingliz tilidagi muqobillari keltirilishini ko‘rsatib o‘tish mumkin.
AKT lug‘atining mobil ilovasi turli kasb egalari bo‘lgan foydalanuvchilar, jumladan AKT soha mutaxassislari, tadqiqot institutlari ilmiy xodimlari, hokimliklarning axborot xizmatlari, tarjimonlar, filologlar, tegishli o‘quv yurtlarning o‘qituvchi va talabalari, boshlovchi va tajribali AT foydalanuvchilar va boshqalar uchun mo‘ljallangan.
Shuningdek, bu lug‘at ZiyoNET ta’lim portaliga keng foydalanish uchun joylashtirilgan bo‘lib, uni AKT sohasidagi yangi so‘z va atamalar bilan to‘ldirib borish imkoni mavjud.
AKT lug‘atining elektron va mobil versiyalarini yaratish tashabbusi BMTTDning “Mahalliy boshqaruv tizimini qo‘llab-quvvatlash” loyihasi (BMTTD loyihasi) tomonidan va “Uzinfokom” DUK ko‘magi ostida amalga oshirilgan bo‘lib, unig maqsadi BMTTDning “Mamlakatni rivojlantirish uchun AKT siyosatini shakllantirish va tatbiq etishda O‘zbekiston Respublikasi Hukumatiga ko‘maklashish” loyihasi tomonidan nashr qilingan “AKT bo‘yicha atamalar glossariysi”dan (birinchi nashr 2005-yilda va ikkinchi nashr 2010-yilda chiqqan) foydalanuvchilarning sonini ko‘paytirishdan iboratdir.
BMTTD loyihasi O‘zbekiston Respublikasi Vazirlar Mahkamasi bilan hamkorlikda Jizzax, Namangan va Toshkent viloyatlarida, mahalliy hukumat va boshqaruv organlarining huquqiy, texnikaviy va kadrlar salohiyatini mustahkamlash, ularning hisobdorligi va ochiq-oydinligini oshirish hamda fuqarolarning mahalliy boshqaruvda ishtirok etishiga ko‘maklashish yo‘li bilan O‘zbekistonda mahalliy boshqaruvning yanada samarali, hisobdor va inklyuziv tizimini rivojlantirish maqsadlarida amalga oshirilmoqda.
Izoh (0)