Ўзбекистондаги миллий алоқа оператори «Ўзбектелеком» АК 2015 йилнинг биринчи ярмида GSM стандартидаги янги уяли алоқа операторини ишга туширмоқчи. Бу ҳақда Алоқа, ахборотлаштириш ва телекоммуникацион технологиялар қўмитаси вакили журналистларга маълум қилди, деб ёзади «Новый век».
Қўмита вакилининг айтишича, июль ойида ускуналар етказиб бериш бўйича эълон қилинган ёпиқ танлов тақдим этилган таклифларнинг танлов шартларига тўғри келмаслиги туфайли бекор қилинган. Шу туфайли GSM-тармоқ билан боғлиқ режалар кечиктирилган.
Энди сентябрь охирида янги танлов эълон қилинади. Ускуна етказиб бериш эса 2014 йил сўнгида бошланади. Дастлаб Тошкентда 2 миллионта рақам ҳажмига эга тармоқни яратиш кўзда тутилган.
Хабар қилинишича, «МТС» ўрнига янги — Universal Mobile Systems'нинг ишга туширилиши Uzmobile'нинг тармоқни кенгайтириш режаларига таъсир қилмайди.
Бундан аввал 2018 йилгача «Ўзбектелеком» аксиядорлик компаниясининг Uzmobile филиали негизида миллий мобил алоқа оператори ташкил этиши хабар берилган эди.
Миллий оператор тармоғини ташкил этиш бўйича чора-тадбирлар жадвалида 2014 йил мобайнида 1020 таянч станциялари, радиореле жиҳозининг 500 комплекти, ҳамда 2 миллион рақамга мўлжалланган коммутация станцияси ва биллинг тизимини ўрнатиш орқали уяли алоқа билан Тошкент шаҳрини қоплаш кўзда тутилган эди.
2015 йилда миллий оператор тармоғи билан барча вилоятлар марказлари, 2017 йил давомида эса республиканинг барча аҳоли пуктларини қоплаш режалаштирилган.
Изоҳ (0)