Facebook’даги «Potrebitel.uz» гуруҳи модератори мактаб синфхоналарининг 40—45 ўқувчини сиғдириш-сиғдирмаслиги билан боғлиқ ҳужжатни топганини ёзиб, хабарига уни илова қилди.
Ўзбекистон Республикаси Санитария қоидалари ва меъёрлари (СанПин) доирасида 2000 йилда чиқарилган ушбу ҳужжат Умумтаълим мактабларида ўқувчиларни ўқитиш шароитларига гигиеник талаблар деб номланади.
Ундаги пунктлардан бирида қайд этилишича, кабинетлар майдони машғулотларнинг фронтал шаклларида (синфдаги бутун ўқув коллективига таълим бериш жараёнида) ҳар бир ўқувчи учун 2,5 м² мўлжалидан келиб чиқиши керак. Гуруҳ бўлиб ишлаш ва индивидуал машғулотларда эса бир ўқувчига 3,3 м² майдон ҳисобланиши керак.
«Бундан келиб чиқиб, 40 ўқувчидан иборат синф учун мўлжалланган ўқув хонаси 100 м² майдонга эга бўлиши керак», — дея хулоса қилади муаллиф. У бугунги кунда мактабдаги стандарт синфхона 60 м², энг катта ўқув хоналари эса 80 м² атрофида эканини қайд этди.
«Демак, бир томондан, меъёр қоидаларининг бузилиши кузатилмоқда, — дея ўз фикрида давом этди фойдаланувчи. — Бошқа томондан эса, синфлар таркибини камайтириш ўқитувчининг бир соатлик бандлиги ҳақидаги қарорга зид келиб қолади».
Постга фикр билдирганлар бундай муҳим ҳужжат билан бўлишгани учун муаллифга миннатдорчилик билдирган. Изоҳ ёзганларнинг баъзилари ота-она, баъзилари ўқитувчи сифатида синфларда ўқувчилар сонининг меъёрдан ошиқлиги айни пайда долзарб муаммо бўлиб турганини қайд этган.
Муаллиф ота-оналарни ўз фарзандларининг қонунда белгиланган шароитларда таълим олишини талаб этишга чақирди. «Мактаб ёки ўқитувчилардан бундай ташаббус кутманг, ўз фарзандларингиз учун ўзингиз курашинг!» — дея даъват этди у.
Изоҳ (0)