“Rosselxoznadzor” xodimlari Rossiya hududi orqali Germaniyadan O‘zbekistonga 420 tonna, AQShdan Qirg‘izistonga 375 tonna tovuq go‘shti olib o‘tilishini taqiqladi. Kristall Export Import va Merito Trading kompaniyalari ushbu mahsulotlarni qabul qilib oluvchi bo‘lgan. Bu haqda Korrespondent.net xabar berdi.
Ma’lum bo‘lishicha, Germaniyadan yuborilgan yuk ko‘zdan kechirilganida qutilarning katta qismida markirovka yorlig‘i yo‘qligi aniqlangan. Boshqa qutilarda esa yorliqlar shunday yopishtirilganki, ularning butunligini buzmasdan turib o‘ramni ochish mumkin, deyiladi xabarda. Ba’zi konteynerlardagi yuklar betartib joylashtirilgan, bu esa qutilarning yirtilib ketishiga sabab bo‘lgan.
AQShdan yo‘l olgan go‘sht veterinar sertifikatida esa zarur ma’lumotlarning ko‘pchiligi aks etmagan. Bundan tashqari, mahsulot ishlab chiqarilgan sana sertifikatdagi axborot bilan mos tushmagan.
Eslatib o‘tamiz, avgust oyida Rossiya AQSh, Kanada, Avstraliya, YeI davlatlari va boshqa bir qator mamlakatlardan oziq-ovqat mahsulotlari importini taqiqladi. Cheklovlar ro‘yxatiga tovuq go‘shti ham kiritildi.
Izoh (0)