Bangladesh terma jamoasi Osiyo o‘yinlarining ilk turida Afg‘onistonni mag‘lubiyatga uchratdi. O‘yindagi yagona golni bangladeshlik Mamunul Islom o‘z hisobiga yozib qo‘ydi. O‘yindan so‘ng o‘z fikrini bildirar ekan, 28 yoshli yarim himoyachi g‘alabadan juda ham xursand bo‘lganini yashirmadi, deb qayd etdi Stadion.uz.
“Ushbu gol faoliyatimdagi eng muhim gol hisoblanadi, hattoki uni hayotimning eng muhim qismi deb atashim mumkin. Musobaqaga jo‘nab ketish oldidan bizning birinchi maqsadimiz Afg‘onistonni mag‘lub etish ekanligini ta’kidlagandim. Biz o‘z maqsadimizga erishdik. Endi O‘zbekistonga qarshi bo‘ladigan ikkinchi o‘yinga o‘z e’tiborimizni qaratamiz”, — dedi Mamunul Islom.
Bangladesh terma jamoasining gollandiyalik bosh murabbiyi De Kruif esa Afg‘oniston bilan o‘yinda g‘alabaga 25 foiz ishonganini ta’kidlab, omad kulib boqsa, O‘zbekiston bilan o‘yinda ham uch ochko qo‘lga kiritishi mumkinligini aytib o‘tdi.
“Juda ajoyib g‘alabani qo‘lga kiritdik. Bu biz uchun ham syurpriz bo‘ldi. Boisi, g‘alaba qozonishimizga 25 foiz ishongandik. Ikkinchi bo‘limda yaxshi o‘ynadik. Biz guruhdan chiqa olamiz yoki yo‘qmi, biror narsa deyish qiyin. Zaxiramizda hali ikkita o‘yin bor. Hozircha O‘zbekistonga qarshi o‘yinga reja tuzishni boshlaymiz. Ozgina omad kulib boqsa, ikkinchi o‘yinda ham uch ochkoni qo‘lga kiritishimiz mumkin. Keling, avval ikkinchi o‘yin qanday o‘tishini kutaylik”, — dedi De Kruif.
Izoh (0)