Bugun, 8-sentabr kuni poytaxtimizdagi badiiy gimnastika bo‘yicha bolalar va o‘smirlar ixtisoslashtirilgan Respublika olimpiya zaxirasi sport maktabida erkin, yunon-rum va ayollar kurashi bo‘yicha kattalar o‘rtasida jahon chempionati bahslari boshlandi. 14-sentabrga qadar bo‘lib o‘tadigan mazkur yirik musobaqada 90 dan ziyod davlatdan mingdan ortiq sportchi jami 24 vazn toifasida g‘oliblik uchun kurash olib boradi. Bu haqda O‘zbekiston Milliy olimpiya qo‘mitasi matbuot xizmati xabar berdi.
Jahon chempionati arafasida Birlashgan kurash usullari federatsiyasi (FILA)ning hisobot saylov Kongressi bo‘lib o‘tdi. Kongressda tashkilotning nomi bundan buyon Butunjahon kurash ittifoqi (United World Wrestling) deya yuritilishi e’lon qilindi.
Yig‘ilishda, shuningdek, UWW’ning yangi Konstitutsiyasi, Nizomi, Dopingga qarshi reglamenti kabi bir qator hujjatlar qabul qilindi. Shu bilan birga, tashkilotning 2014—2016-yillardagi byudjeti, istiqbolli rejalari tasdiqlandi.
Kongress a’zolari Butunjahon kurash ittifoqi rahbarligiga Nenad Lalovichni bir ovozdan sayladilar. Ushbu nufuzli tashkilotning Byuro a’zoligiga hamyurtimiz Ahrol Ro‘ziyev qayta saylandi.
Bugun jahon chempionatining birinchi kuni erkin kurash bo‘yicha 57 kg, 70 kg, 86 kg, 125 kg vazn toifalarida g‘olib va sovrindorlar nomi ma’lum bo‘ladi.
Mazkur musobaqada O‘zbekiston sharafini Hayot Sayfullayev (-57 kg), Jamshid Kenjayev (-61 kg), Ixtiyor Navro‘zov (-65 kg), Bekzod Abdurahmonov (-70 kg), Rashid Qurbonov (-74 kg), Umidjon Ismanov (-86 kg), Umar Umarov (-97 kg), Qurbon Qurbonov (-125 kg) himoya qiladi.
Izoh (0)