Япониянинг бутун миллий тарихида 100 ёшдан ошган аҳоли сони рекорд даражага етди, дея хабар бермоқда ИТАР-ТАСС мамлакат соғлиқни сақлаш, меҳнат ва фаровонлик вазирлигига таяниб. Бугунги кунда улар 58,8 минг кишини ташкил этади, бу ўтган йилги кўрсаткичдан 4,4 мингтага кўпдир.
Маълум бўлишича, юз ёшдан юқори японияликлар сони кетма-кет 44 йилдан буён тўхтовсиз ўсиб келмоқда. Уларнинг 87 фоизи аёллардир. Вазирлик ҳар йили 15 сентябрда нишонланадиган миллий байрам — Кексаларни ҳурматлаш куни арафасида бундай маърузани эълон қилади.
Япониядаги энг кекса киши — Мисао Окава исмли аёл бўлиб, у мартда 116 ёшни қарши олди. У Гиннеснинг Рекордлар китобига киритилган Ер сайёрасидаги энг кекса фуқаро ҳамдир. Дунёдаги энг кекса эркак ҳам япониялик — 1903 йилда туғилган Сакари Момои.
Японияда узоқ умр кўрувчиларнинг рекорд даражада кўпайиб бориши билан бирга, аҳоли сони қисқариб бормоқда — 2013 йилда у урушдан кейинги давр бўйича энг юқори суръатларда пасайган. Мамлакат аҳолиси таркибида 65 ёшдан юқори кишилар улуши 24,4 фоизгача ўсган, 15 ёшдан кичик болалар ҳиссаси эса 13 фоизга тенгдир.
Изоҳ (0)