Bir necha o‘n yillab davom etgan, C gepatitini davolashning eng yaxshi usullarini izlash ishlari o‘z yakuniga yetmoqda, deb yozadi “Ommabop mexanika” nashri. Shu yil AQSh Oziq-ovqat va dori-darmon sifati ustidan nazorat bo‘yicha boshqarmasi (FDA) yangi Sovaldi preparatini tasdiqlashi kutilmoqda. Pharmasset farmatsevtika kompaniyasining ushbu preparati dunyoda 170 million kishiga azob berayotgan va har yili 350 ming bemorni hayotdan olib ketayotgan C gepatitini davolashga qodir.
U Gilead kompaniyasiga tegishli sofosbuvir va ledipasvir kabi ikkita dori birikmasidan iborat. Ta’kidlash joiz, Sovaldi’ning bir dona hapdorisi ming dollar, to‘liq 12 haftalik davolanish kursi esa 84 ming dollarga tushadi.
Dorining bunday baland narxi Amerikaning qator sug‘urta kompaniyalari va ko‘plab shifokorlarida norozilik uyg‘otdi. AQShdagi Jon Xopkins universitetining infeksion kasalliklar bo‘limi direktori Devid Tomas fikricha, C gepatitiga qarshi dorining qimmatbaholigi butun dunyoda sog‘liqni saqlash tizimi rivojlanishiga to‘siq bo‘ladi.
C gepatitini davolashning standart usuli immun tizimining eng kuchli oqsillaridan biri — interferonning sintetik varianti hamda virusga qarshi preparat — ribavirinni qabul qilishdan iboratdir. Bu usul virusning genotipiga qarab, bemorlarning 25 foizdan 75 foizgacha bo‘lgan qismiga yordam beradi, biroq qo‘shimcha asoratlar qoldirib, surunkali charchoq, depressiyaning kuchli shakllari va anemiyani keltirib chiqaradi. Sovaldi esa kamida 94 foiz bemorlarni tuzatdi, aytib o‘tilgan asoratlar esa sinov vaqtida kuzatilmadi.
Izoh (0)