Донбассдаги аксилтеррорчилик операциялари якунланди, энди асосий вазифа — Украинага бостириб кирган Россия Федерациясига қарши мудофаани сафлашдир. Бу ҳақда Украина мудофаа вазири Валерий Гелетей ўзининг Facebook’даги саҳифасида маълум қилди.
«Украина Шарқини озод қилиш бўйича операция тугади. Энди зудлик билан нафақат аввал террорчилар томонидан эгаллаб олинган ҳудудларда мустаҳкам ўрнашиб олишга, балки Украинанинг бошқа ҳудудларига ҳужум қилишга ҳам уринаётган Россияга қарши мудофаа ташкил қилишимиз керак. Бизнинг уйимизга Европа Иккинчи жаҳон урушидан буён кўрмаган катта уруш келди», — деб ёзади у.
Ҳарбий идора раҳбарининг сўзларига кўра, «бундай урушда қурбонлар сони юзлаб эмас, минглаб, ҳаттоки ўн минглаб бўлади». «Бугунги кунда биз дивизия ва полклар билан иш кўрмоқдамиз. Эртага корпусларга дуч келишимиз мумкин», — дея қайд этди вазир.
«Норасмий каналлар орқали Россия огоҳлантириш бериб, қарама-қаршилик давом этаверса, бизга қарши тактик ядро қуроли қўллаш билан таҳдид қилган», — дея қўшимча қилди Гелетей.
Шу билан бирга, мудофаа вазири бундай урушда ғолиб чиқиш учун барча кучлар тўлиқ тўпланиши зарурлиги, шу туфайли куч блоки раҳбарларини истеъфога чиқариш ҳақида ҳозир гап ҳам бўлиши мумкин эмаслигини айтиб ўтди.
«Сегодня» нашрининг эслатишича, Украина президенти Пётр Порошенко 25—31 август кунлари аксилтеррорчилик операциялари зонасидаги ҳодисалар таҳлил қилиниб, кадрлар билан боғлиқ қарорлар қабул қилинишини таъкидлаган эди.
«Вазият сўнгги кунларда янада кескинлашиб кетди. Украинага қарши қўшни давлатдан энди тўғридан-тўғри ва очиқ тажовуз бошланди. Бу жанговар ҳаракатлар ҳудудидаги муҳитни бутунлай ўзгартириб, куч тузилмаларимиз олдига янги ва анча мураккаб масалаларни қўяди», — деган эди у Богун номидаги ҳарбий лицейдаги тадбирда.
Изоҳ (0)