AQShning sobiq prezidenti kichik Jorj Bush Ice Bucket Challenge (“Bir chelak muzdek suv sinovi”) aksiyasida ishtirok etib, muzdek suvda cho‘mildi. U estafetani o‘z qizi Jenna Bush Hagerdan olib, sobiq prezident Bill Klintonga topshirdi. Muzdek suv to‘la chelakni kichik Bush boshidan uning xotini Lora Bush quyib yubordi.
Suv quyilishidan avval Jorj Bush cho‘milishni istamasligi, chunki undan keyin “prezidentlarga xos” ko‘rinishini yo‘qotishini aytadi va undan ko‘ra xayriya jamg‘armasiga pul o‘tkazish osonroq ekanligini hazilomuz qayd etadi. Shundan so‘ng uning rafiqasi suvni quyib yuboradi va pullaridan ayrilmoqchi emasligini, o‘zi muzdek suvda cho‘milib, soch turmagini buzmoqchi emasligini ham aytib hazillashadi.
Ushbu aksiyaga ko‘ra mashhur insonlar o‘z ustidan muzdek suv quyib, do‘stlariga shunday qilishni yoki xayriya jamg‘armasiga pul o‘tkazishni taklif qilishi lozim.
Xayriyadan tushadigan mablag‘ amiotrofik skleroz — Lu Gerig kasalligiga chalinganlarga sarflanadi. Bu kasallik odamning bosh miya tizimiga ta’sir qilib, keyinchalik falajlikka olib kelishi mumkin.
Izoh (0)